Chun leibhéal comhsheasmhach cosanta agus ardleibhéal cosanta a áirithiú do dhaoine nádúrtha agus chun na bacainní ar shreabhadh sonraí pearsanta laistigh den Aontas a bhaint, ba cheart an leibhéal céanna cosanta a bheith i ngach Ballstát do chearta agus saoirsí daoine nádúrtha i ndáil le próiseáil sonraí den sórt sin. Ba cheart a áirithiú go gcuirtear na rialacha maidir le cosaint ceart bunúsach agus saoirsí bunúsacha daoine nádúrtha i bhfeidhm go comhsheasmhach agus go haonchineálach ar fud an Aontais i ndáil le sonraí pearsanta a phróiseáil. Maidir le sonraí pearsanta a phróiseáil chun go gcomhlíonfaí oibleagáid dhlíthiúil, chun cúram a chur i gcrích a dhéantar ar mhaithe le leas an phobail nó i bhfeidhmiú údaráis oifigiúil atá dílsithe don rialaitheoir, ba cheart cead a bheith ag na Ballstáit forálacha náisiúnta a choimeád nó a thabhairt isteach chun cur i bhfeidhm na rialacha atá sa Rialachán seo a shonrú tuilleadh. I gcomhar leis an dlí ginearálta agus cothrománach maidir le cosaint sonraí lena gcuirtear Treoir 95/46/CE chun feidhme, tá roinnt dlíthe earnáil-shonracha ag na Ballstáit i réimsí ina bhfuil gá le forálacha níos sonraí. Déantar foráil sa Rialachán seo freisin go mbeadh lamháil solúbthachta ag na Ballstáit chun a rialacha a shainiú, lena n-áirítear a rialacha a shonrú maidir le catagóirí speisialta sonraí pearsanta (“sonraí íogaire”) a phróiseáil. Sa mhéid sin, ní eisiann an Rialachán seo dlí Ballstáit lena leagtar amach na dálaí le haghaidh cásanna sonracha próiseála, lena n-áirítear na coinníollacha a chinneadh ar bhealach níos cruinne faoina bhfuil an phróiseáil a dhéantar ar shonraí pearsanta dlíthiúil.
* Ní hé seo an cur síos/teideal oifigiúil ar an réamhrá anseo.
Cén fáth a bhfuil Aithris 10 tábhachtach do chomhlíonadh GDPR?
Leagann Aithris 10 béim ar an ngá atá le leibhéal comhsheasmhach agus ard cosanta do shonraí pearsanta ar fud Bhallstáit uile an Aontais Eorpaigh. Cuireann sí in iúl, cé go gceadaíonn GDPR éagsúlachtaí náisiúnta áirithe, nach mór don leibhéal foriomlán cosanta fanacht coibhéiseach chun bacainní ar shaorshreabhadh sonraí pearsanta a sheachaint. Neartaíonn an aithris seo tábhacht rialacha comhchuibhithe a sholáthraíonn cinnteacht dhlíthiúil agus a chothaíonn muinín sa mhargadh inmheánach. Luaitear í go minic i bplé rialála chun a chinntiú nach lagaíonn dlíthe náisiúnta bunchuspóirí GDPR. Ní mór d’eagraíochtaí a chinntiú go bhfanann a gcleachtais próiseála sonraí comhsheasmhach agus comhlíontach ar fud dlínsí éagsúla san AE.